大雅區 陽明國小 黃美銀、蕭翠惠 2016-12-12 報導

傷早到學校,欲按怎?

逐工早起時,攏有一寡仔學生囡仔誠早就來到學校,因為家長愛趕去上班,驚時間袂赴,只好較早將囡仔送來學校。
守衛室邊仔前埕,遐有一組大張的柴枋桌椅。為著安全起見,遐的學生囡仔就攏踮遐等,一直到時間到才會當入去教室。
最近的天氣,早起時攏會較冷,校長毋甘這陣囡仔受著風寒,就交辦主任愛揣一个所在,上重要的閣愛囥一寡仔冊,予囡仔會當佇等待的時間坐落來看冊,因為閱讀是一件真重要的代誌,尤其是早起時遐爾仔寶貴的時間。
學校因為活動中心的工程猶咧進行,會當使用的空間嘛有限,就揣一个所在,予遮較早到的囡仔袂去寒著,閣有冊通看,這攏愛感謝校長的貼心。